Girespeto ni Cebu City Mayor Nestor Archival ang nahimong desisyon sa Office of the Ombudsman ug misaad nga bayran ang multa nga gipahamtang tungod sa mga kakulangan sa operasyon sa Colon Street Night Market niadtong 2025.
Diin ang kantidad sa multa katumbas sa usa ka bulan nga batakang suweldo ubos sa Salary Grade (SG) 30, nga gitakda alang sa mga mayor sa mga highly urbanized city.
Matod ni Archival, girespeto niya ang desisyon sa Office of the Ombudsman ug motuman siya sa ilang direktiba, bisan pa man nga wala pa mahinayon ang pagbayad.
Gikanayon sa mayor nga aduna na’y representante nga miadto sa opisina sa Ombudsman, apan wala mahinayon ang pagbayad tungod kay gikinahanglan pa sa maong opisina ang pagdawat sa usa ka pormal nga pahibalo.
Ubos sa sistema sa gobyerno sa pag-standardize sa suweldo, ang mga mayor sa highly urbanized cities nahisakop sa SG 30, diin ang binulan nga batakang suweldo anaa sa taliwala sa P196,199 ug P226,319, depende sa “salary step.” Ug ang eksaktong kantidad sa multa ni Archival magdepende sa iyang kasamtangang batakang suweldo.
Nakita sa Ombudsman nga sad-an si Archival sa “simple neglect of duty” o yano nga pagpabaya sa katungdanan tungod sa mga kakulangan sa regulasyon sa operasyon sa night market niadtong 2025. Nagpasidaan usab ang maong opisina nga kung sublion ang susamang sayop, mahimong mas bug-at pa ang ipahamtang nga silot.
Ang kaso naggikan sa usa ka reklamo nga gisang-at niadtong Oktubre 2025 ni City Councilor Pastor “Jun” Alcover Jr., kinsa mikuwestiyon sa pagdumala sa kagamhanang siyudad sa night market ug sa kasabotan niini uban sa Participative Association of Sugbo Vendors Inc. (PASVI).
