Gipasiugda ni Cebu Archbishop Alberto Uy ang kamahinungdanon sa paghandum sa Adlaw sa mga Santos (All Saints’ Day) ug Adlaw sa mga minatay (All Souls’ Day).
Kini nagpakita nga ang maong okasyon dili lamang alang sa mga namatay, kondili mahinungdanon usab alang sa mga buhi.
Namatikdan sa Arsobispo nga sa tibuok nasud, ang mga pamilya nagtigom ug nagkahiusa diha sa mga sementeryo aron mag-ampo, magdala og mga bulak, ug magdagkot og mga kandila alang sa ilang mga minahal sa kinabuhi nga mitaliwan na. Hinuon, nagpahinumdom siya nga ang Adlaw sa mga Santos, usa usab ka higayon aron ipasiugda ang direksyon nga gipili sa usa ka tawo sa iyang kinabuhi.
Matod niya, ang mga santos wala gilalang aron mahimo lamang nga mga estatwa o mga imahen nga adunay korona sa kahayag. Inay sila kay mga ordinaryong tawo nga nakaagi og mga kalisdanan, nasakitan o nabungkag ang pagkatawo, ug napugos sa pagbalik sa Dios aron magpalig-on ug magbag-o sa ilang kinabuhi.
Dugang pa sa Arsobispo, ang pagkabalaan dili lamang alang sa pinili nga pipila ka mga tawo. Ang tawag sa Diyos alang sa tanan mao ang pagkinabuhi nga balaan—bisan pinaagi sa gagmay o yano nga mga buhat, sama sa kugihan nga pagserbisyo ug pagkamatinud-anon sa inadlaw-adlaw nga kinabuhi; pagpakita og gugma ug pagpaminaw sa uban; ug paghatag og pagtagad ug pag-atiman sa mga huyang, mga kabos, ug kadtong mga nakalimtan na sa katilingban.
Nanawagan usab siya sa mga tumutuo nga i-ampo si Pope Leo XIV, ang mga obispo, mga pari, ug ang tanang matinud-anon nga mga lider sa Simbahan, aron magpabilin silang matinud-anon, mapainubsanon, ug matinahuron diha sa pagtudlo ug pagpaambit sa gugma sa Diyos.
