Nagpagawas og komprehensibong plano ang Bohol Police Provincial Office (PPO) alang sa seguridad ug masiguro ang kaluwasan ug kahapsay sa tibuok probinsya atol sa pagsaulog sa ‘Undas’ (Adlaw sa mga Santos ug Adlaw sa mga Kalag).
Matod ni PMAJ Joseph Lopena, tigpamaba sa PNP Bohol, nga mokabat sa 2,996 ka mga personahe ang ipakatap sa nagkalain-laing estratehikong lokasyon ug pampublikong lugar.
Diin sa 137 ka mga sementeryo sa Bohol (18 ka pribado ug 119 ka publiko), magbutang og 121 ka Police Assistance Desks (PADs) nga bantayan sa 260 ka mga pulis. Dugang pa niini ang 487 ka mga personahe, 333 ka mga uniformed personnel gikan sa gobyerno, ug 1,116 ka mga force multiplier/boluntaryo ang ibutang aron magbantay sa ubang bahin sulod sa mga sementeryo.
Samtang sa 81 ka mga simbahan sa tibuok probinsya, 77 ka mga personahe sa PNP, 46 ka miyembro gikan sa ubang ahensya sa pagpatuman sa balaod, ug 134 ka mga boluntaryo ang ipakatap.
Ingon man nga gilauman nga modagsa usab ang mga turista sa probinsya, adunay 37 ka mga pulis gikan sa Bohol Tourist Police Unit, uban sa ubang uniformed personnel, ang gitudlo sa 37 ka dagkong mga destinasyon sa mga turista.
Nagbutang usab og mga personahe sa 6 ka mga bus terminal (10 ka personahe sa PNP, 10 ka boluntaryo), 10 ka pantalan (20 ka personahe sa PNP, 20 ka law enforcers), ug sa airport (4 ka personahe sa PNP, 27 ka ubang law enforcers).
Sa kinatibuk-an, ang PNP Bohol nagpaabot nga moabot sa kapin 240,000 ka mga bisita ug residente ang moadto sa mga sementeryo karong *Undas*. Busa, ang PNP nakig-alayon sa AFP, BFP, Philippine Coast Guard, mga medical team, ug uban pang mga grupo sa volunteers aron masiguro ang kalinaw ug kahapsay sa tibuok probinsya. via Bombo Rexmond Omega
