Nagtinguha ang administrasyon ni US President Donald Trump nga ipa-deport ang kapin 150 ka Afghan immigrants pabalik sa Afghanistan pinaagi sa Pakistan.
May kalabotan kini sa travel ban nga gipatuman ni Trump batok sa daghang nasud, lakip ang Afghanistan, isip kabahin sa hugot nga kampanya sa iyang administrasyon batok sa mga imigrante nga ilegal nga nagpuyo sa Estados Unidos.
Lakip sa posibleng ipa-deport ang mga paryente sa mga Afghan nga mitabang sa militar sa US sa wala pa makontrolar sa Taliban ang Kabul niadtong 2021, sumala sa Afghan refugee advocacy group nga AfghanEvac.
Dili direktang ibalik sa US ang maong mga Afghan ngadto sa Afghanistan.
Hinuon, nakigsabot kini sa Pakistan aron mapadali ang ilang pagpalagpot ug pagpauli sa ilang nasud.
Nahisubay kini sa polisiya sa Pakistan nga mopapauli sa mga Afghan nga walay balidong visa o permiso sa pagpuyo, taliwala sa nagkagrabeng relasyon sa duha ka nasud.
Gikatakdang mobiya sa Lunes ang unang flight nga magdala sa maong mga imigrante.
Samtang, bisan pa sa kinatibuk-ang amnestiya nga gideklara sa Taliban alang sa mga Afghan nga nakigtambayayong sa mga pwersa sa Kasadpan, nakarekord gihapon ang United Nations og mga insidente sa pag-abuso, krimen, ug extrajudicial killings batok kanila.
