Andam na ang habig sa mga biktima sa kampanya batok sa droga nga mopresentar sa ilang mga ebidensya ug saksi sa husay ni kanhi Presidente Rodrigo Duterte atubangan sa International Criminal Court (ICC) sa Nobyembre 30.
Matod ni Atty. Neri Colmenares, legal counsel sa mga pamilya sa mga biktima sa extrajudicial killings, ang status conference sa Nobyembre 2 mao na ang katapusang higayon aron hisgotan ug mahapsay ang mga detalye sa umaabot nga husay.
Andam na usab ang ilang opening statements ug mga ebidensya nga nagtumong sa pagpakita sa papel ni Duterte ug sa epekto sa kampanya batok sa droga sa kinabuhi sa mga biktima.
Gibanabana nga mopresentar ang prosekusyon og 60 hangtod 70 ka saksi, samtang adunay 52 ka factual matters nga posibleng kasabutan sa duha ka habig.
Bisan limitado ang pondo sa legal team alang sa pagbiyahe ngadto sa Netherlands, gipasalig ni Colmenares nga aduna gihapoy opisyal nga representante nga motambong sa hearing.
Gipasiugda usab sa abogado nga base sa independenteng medical assessment, angayan si Duterte nga moatubang sa husay, bisan pa kon mopili siya nga dili motambong sa status conference.
