PROVINCE OF BOHOL- Miangkon ang usa ka 15-anyos nga batan-ong lalaki nga siya ang mipatay sa iyang 46-anyos nga inahan gamit ang martilyo, human sa giingong panaglalis sulod sa ilang panimalay sa Panglao, Bohol.
Human sa insidente, giingong giguyod sa menor de edad ang lawas sa iyang inahan ngadto sa usa ka abandonadong septic tank, nga nahimutang mga 30 metros gikan sa ilang balay, ug gitabonan kini og mga bato.
Sa pakighinabi sa Bombo Newsteam, gikumpirma ni Police Major Joseph Lopena, tigpamaba sa Bohol Police Provincial Office (BPPO), nga miangkon ang tin-edyer sa krimen human siya gipangutana sa kapulisan sa Panglao.
Base sa pasiunang imbestigasyon, nasuko ang 15-anyos human siya gibadlong sa iyang inahan tungod sa pag-absent sa klase.
Misangko sa pisikal nga komprontasyon ang ilang panaglalis hangtod mikuha ang tin-edyer og martilyo ug gibunalan sa ulo ang iyang inahan sa makadaghang higayon.
Narekober sa kapulisan ang martilyo nga gituohang gigamit sa krimen human gibutyag sa tin-edyer nga gitago niya kini ilalom sa lababo sa kusina.
Samtang, gibutyag ni Lopena nga base sa impormasyon nga nakuha sa mga imbestigador, nailhan ang tin-edyer isip maayong estudyante ug atleta.
Giingong wala usab siyay bisyo ug wala nalambigit sa bisan unsang grupo.
Nasayran usab sa mga awtoridad nga aktibo ang tin-edyer sa online game nga Roblox ug nakaabot na sa taas nga lebel sa maong dula.
Nadiskobrehan ang lawas sa biktima human namatikdan sa usa ka silingan, nga paryente usab sa pamilya, ang daghang langaw nga nagtapok duol sa abandonadong septic tank.
Tungod niini, gisusi nila ang maong septic tank ug didto nakit-an ang lawas sa babaye. Diha-diha nilang gitaho ang insidente ngadto sa kapitan sa barangay.
Matod sa Panglao Municipal Police Station, gipadala dayon ang mga kapulisan ngadto sa lugar, samtang nagpahigayon usab og pagsusi sa crime scene ang Scene of the Crime Operatives (SOCO).
