Gipalig-on sa Cebu City Mining Regulatory Board (CMRB), uban sa panguna ni Mayor Nestor Archival ug Cebu City Councilor Hon. Joel Garganera, ang ilang pakigsagubang alang sa responsableng pagdumala sa mga kahinguhaan, pagpanalipod sa kinaiyahan, ug kaluwasan sa publiko atol sa ilang ikalimang opisyal nga miting.
Gihisgotan sa maong miting ang mga kinahanglanong update kalabot sa mga aplikasyon alang sa permiso sa komersyal nga pagkuha og balas ug graba, ingon man ang mga kritikal nga hisgutanan bahin sa nahitabong pagdahili sa yuta sa Barangay Pulangbato.
Dugang pa niini, gipresentar usab ang mga nakaplagan sa Cebu City Environment and Natural Resources Office (CCENRO) gikan sa gihimong mga imbestigasyon sa mga dapit nga girekomendar nga ipailalom sa Cease and Desist Orders (CDOs) sa nagkalainlaing dapit sa dakbayan sa Sugbo.
Atol sa pakighinabi sa Bombo Newsteam kang Konsehal Joel Garganera, gipadayag niini ang iyang labihan nga kabalaka batok sa mga nagpadayon nga ilegal nga quarrying sa kabukiran sa lungsod.
Matud niini nga pila ka na ka tuig ang milabay apan kanunay gihapon ang paghakot ug daw giilad na kita niini, busa iyang gipangayoan si Engineer Peros sa CCENRO nga kuhaon ang tanan dokumento ug dili lang kini angay taman sa cease and desist inay kinahanglan gayud kini nga mapasakaan og kaso.
Gihimug-atan usab sa konsehal ang mga pamaagi sa uban nga mapanlimbongon nga mag-apply og permiso alang sa subdivision plan, apan sa tinuod nga bahin, nagpahigayon na diay kini og quarrying operations.
Gipaambit usab sa opisyal nga dako kaayo ang problema karon sa kabukiran tungod sa kakusog ug ka-rampant sa ilegal nga mga buhat, ug kinahanglan nga adunay lig-on ug haom nga pamaagi aron mapaundang ug matapos na kining mga daotang paagi sa pagpahimulos sa kinaiyahan.
