Paabuton pa ni Cebu City Mayor Nestor Archival ang posibleng mga rebisyon sa mga guidelines sa Department of Education (DepEd) maylabut sa pagsuspenso sa klase, nunot sa posibleng epekto sa “Very Strong El Niño” sa 2026–2027.
Kini ang iyang gibutyag human sa usa ka tigom uban sa mga prinsipal ug administrador sa mga pampubliko ug pribadong eskwelahan sa Dakbayan sa Sugbo, diin gipaambit sa mga opisyal sa edukasyon ang ilang nagkalain-laing kasinatian ug mga kabalaka bahin sa epekto sa grabeng kainit diha sa mga eskwelahan.
Matod ni Archival, maghulat siya sa resulta sa gitakdang tigom tali sa DepEd ug sa Philippine Atmospheric, Geophysical and Astronomical Services Administration (PAGASA) sunod semana, una pa niya hukman kung gikinahanglan ba ang mga kausaban sa kasamtangang guidelines.
Atol sa konsultasyon, pipila ka mga school representatives ang nagpadayag og kabalaka mahitungod sa pagsuspenso sa klase kung ang “heat index” moabot sa 33-41 degrees Celsius, mamahimo ra gihapong dumalahon sa ilang tagsa-tagsa ka mga eskwelahan.
Ubos sa DepEd Memorandum No. 0969, o ang “Anticipatory Action, Preparedness, and Protective Measures for the 2026–2027 Super El Niño,” ang mga school heads mahimong mosuspenso sa mga klase kung ang “heat index” moabot sa 42 degrees Celsius o labaw pa, nga giklasipikar ubos sa kategoryang danger.
Samtang alang sa “heat index” nga 33-41 degrees Celsius, o ang extreme caution, ang mga eskwelahan gimandoan nga mobalhin ngadto sa mas gaan nga mga kalihokan sa klase imbes nga awtomatikong suspensuhon.
Sapikas bahin, kung ang “heat index” anaa sa lebel nga 27-32 degrees Celsius, nga giisip nga kategorya sa “caution”, ang mga tunghaan mahimong mopa-mubo sa oras sa klase o magpatuman sa pagtuon gikan sa balay, samtang Ang “face-to-face” nga mga klase mahimong ipadayon kung ang kahimtang dili delikado, diin ang “heat index” anaa sa 27 degrees Celsius o mas ubos pa.
Dugang ni Archival, magpadayon ang mga eskwelahan sa pagsunod sa kasamtangang mga guideines ubos sa DepEd Memorandum No. 0969 samtang nagpaabot sa resulta sa gitakdang tigom tali sa DepEd ug PAGASA sunod semana, diin mahimong hisgotan ang posibleng mga kausaban sa polisiya.
