CENTRAL VISAYAS- Mipadayag og kabalaka si Jaime Paglinawan, Chairperson sa BAYAN Central Visayas, sa pag-postpone sa Barangay and Sangguniang Kabataan Elections (BSKE), tungod sa epekto niini sa katungod sa katawhan nga makapili sa ilang mga lider sa barangay.
Matod ni Paglinawan, importante ang eleksyon sa barangay level kay kini ang higayon nga makapili ang mga botante sa mga opisyal nga ilang gisaligan ug makapuli usab sa mga lider nga wala makatagbaw sa ilang pagserbisyo.
Gipasabot niini nga adunay mga barangay officials nga tarong ug maayo ang pagserbisyo sa ilang mga constituents, apan aduna usab mga opisyal nga wala makatuman sa ilang responsibilidad ug naggamit sa ilang posisyon alang sa personal nga interes.
Lakip sa mga batakang serbisyo nga gipaabot sa katawhan gikan sa ilang mga opisyal mao ang patas nga paghatag og ayuda, pagkolekta sa basura ug pagtagad sa nagkadaiyang panginahanglanon sa komunidad.
Gidugang ni Paglinawan nga daghan na ang nagpaabot nga mapulihan ang mga opisyal nga wala makatagbaw sa ilang pagserbisyo, lakip na ang pipila ka mga opisyal sa Sangguniang Kabataan.
Gipunting usab niya ang posibleng politikanhong impluwensiya sa mga opisyal sa barangay panahon sa nasyonal ug lokal nga piniliay.
Matod niya, dako ang ilang impluwensiya sa tagsa-tagsa ka komunidad ug mahimo silang mahimong kabahin sa political machinery sa mga kandidato nga nagtinguha sa nagkalainlaing posisyon, gikan sa konsehal hangtod sa pagka-presidente.
Busa, gipasiugda ni Paglinawan nga ang pagpili sa mga lider sa barangay kinahanglan ibase sa ilang abilidad, integridad ug kapasidad sa pagserbisyo sa katawhan.
