Namatay ang lima ka batang babaye human mahulog sa usa ka lalom nga sapa ang bus nga ilang gisakyan niadtong Martes sa probinsya sa Kandal, Cambodia.
Nahimutang ang maong probinsya mga 40 kilometro sa amihanan sa Phnom Penh, ang kapital sa nasud.
Base sa mga nakasaksi, kalit nga miharang ang usa ka motorsiklo sa atubangan sa bus, hinungdan nga napugos ang drayber sa kalit nga pagpreno.
Tungod niini, nadakin-as ang bus gikan sa dalan ug nahulog sa sapa.
Naningkamot ang mga lokal nga residente nga luwason ang mga bata, apan naglisod sila tungod sa giladmon sa tubig.
Gikataho nga nagdala ang bus og 26 ka estudyante nga nag-edad og 12 hangtod 14 anyos.
Gawas sa lima nga namatay tungod sa pagkalumos, tulo ang anaa sa kritikal nga kahimtang, samtang 18 pa ang naangkon og mga samad.
Samtang, gikustodiya na sa kapulisan ang 31-anyos nga drayber alang sa dugang nga imbestigasyon.
