Patay ang usa ka 32-anyos nga lalaki human gipusil sa wala pa mailhing suspek sa Sitio Tayud, Barangay Basak Pardo, dakbayan sa Sugbo, pasado alas 10:00 sa buntag niadtong Nobyembre 11, 2026.
Giila ang biktima nga si Reian John Cortes Jimenez, walay trabaho ug residente sa Sitio Janssen, Barangay San Nicolas, dakbayan sa Sugbo.
Base sa inisyal nga imbestigasyon, nakadawat og alarma ang mga sakop sa Inayawan Police Station 7 pasado alas 10:20 sa buntag human motawag ang usa ka concerned citizen aron ireport ang pagpamusil.
Pag-abot sa kapulisan, ilang nakaplagan ang biktima nga nagkulob ug adunay mga samad pinusilan sa nagkalain-laing bahin sa iyang lawas.
Samtang, daling mikalagiw ang wala pa mailhing suspek human sa pagpamusil, sumala sa mga nakasaksi.
Padayon ang imbestigasyon sa kapulisan aron matino ang motibo sa krimen ug mailhan ang responsable sa pagpamusil.
