Posibleng malapawan sa Commission on Elections (COMELEC) ang ilang target nga tulo ka milyon ka bag-ong rehistradong botante alang sa 2028 National and Local Elections, human sa taas nga gidaghanon sa mga nagparehistro atol sa unang duha ka adlaw sa voters registration.
Matod ni COMELEC Chairman George Erwin Garcia, dul-an sa 80,000 ka aplikasyon ang natala sa tibuok nasod sukad nagsugod ang pagparehistro niadtong Nobyembre 10.
Kini nga gidaghanon mas taas kon itandi sa miaging panahon sa pagparehistro niadtong Agosto 2025, diin anaa lamang sa gibana-bana nga 20,000 ka tawo ang nagparehistro sulod sa unang duha ka adlaw.
Gipahayag usab ni Garcia ang iyang katagbawan sa pagdagsang sa mga batan-on—ilabi na kadtong nag-edad og 17 ug 18—nga nagpakita sa interes sa bag-ong henerasyon sa umaabot nga eleksyon.
Hinuon, gipasabot ni Garcia nga usa sa mga hinungdan sa taas nga linya sa pipila ka mga lugar nga gipahigayonan sa pagparehistro, sama sa Luneta Park, mao ang kamatuoran nga daghang mga estudyante ang gikinahanglan sa ilang mga eskwelahan nga magpakita og sertipikasyon sa pagka-botante o pruweba sa pagparehistro.
Tungod niini, nakig-alayon ang COMELEC sa maong mga eskwelahan aron mohangyo nga lugwayan ang ilang mga deadline, aron masiguro nga adunay igong panahon ang mga estudyante sa pagkompleto sa ilang pagparehistro.
Ang pagparehistro sa mga botante magpadayon hangtod sa Hulyo 30, 2027. Tumong sa COMELEC nga makadugang og tulo ka milyon ka botante, nga magdala sa kinatibuk-ang gidaghanon sa mga rehistradong botante ngadto sa 74 ka milyon sa dili pa ang eleksyon sa 2028.
