Gihulagway nga malampuson ang gipahigayong Dugong Bombo 2026 sa Dakbayan sa Sugbo human nakakolekta og 191 ka bags sa dugo ang maong tinuig nga blood-letting activity.
Matod ni Charlene Mae Watin, RMT, Donor Recruitment Officer sa Philippine Red Cross (PRC) Blood Services, dako kaayo kini og ikatabang sa ilang blood bank tungod kay ang usa ka unit o bag sa dugo mahimong makaluwas ug makatabang og tulo ngadto sa upat (3-4) ka mga pasyente.
Gipasabot usab niya nga dako kini og tabang alang sa mga adlaw-adlaw nga panginahanglanon sa dugo, sama sa mga biktima sa aksidente ug sa mga inahan nga manganakay.
Sa kinatibuk-ang assessment ni Watin, malipayon siyang mitaho nga hapsay, paspas ang proseso, ug walay natala nga grabeng insidente o komplikasyon sa mga donor atol sa tibuok adlaw nga kalihokan. Bisan pa man og adunay pipila ka mga gagmay nga hagit nga nasugatan, giklaro niya nga dili kini babag aron ipadayon ug mas palapdan pa ang maong programa sa sunod nga tuig, ilabi na nga daghan na ang nadasig sa pag-donate.
Subay niini, mipadayag og dakong pagpasalamat si Watin sa ngalan sa Philippine Red Cross ngadto sa Bombo Radyo Cebu, Star FM Cebu, Bombo Radyo Philippines, Bombo Radyo Philippines Foundation, ug sa tanang mga sponsors ug indibidwal nga misuporta.
Ingon man nga nanghinaot siya nga magpadayon pa ang maong nindot nga panagtambayayong sa mosunod pang katuigan aron mas daghan pang kinabuhi ang matabangan.
