-- ADVERTISEMENT --

Namatay sa tambalanan si Miguel Angel Felix Gallardo, ang gibantogan nga “Boss of Bosses,” human makahi-agum og multiple organ failure kon wala na paggana sa daghang importanteng organ sa iyang lawas.

Sumala sa mga awtoridad, gibalhin siya sa usa ka pribadong ospital sa siyudad sa Guadalajara duha ka adlaw sa wala pa siya namatay.

Si Gallardo maoy usa sa mga nagtukod sa Guadalajara Cartel nga nahimong usa sa unang dagkong organisasyon sa ilegal nga negosyo sa droga sa Mexico.

Nabantog kini tungod sa pagpadala og daghang cocaine ngadto sa Estados Unidos ug sa pakig-alyansa sa mga drug lord sa Colombia, ka-uban ang Medellin Cartel ni Pablo Escobar.

Niadtong 1985, nalambigit siya sa pagpatay kang Enrique “Kiki” Camarena, usa ka ahente sa US Drug Enforcement Administration o DEA.

-- ADVERTISEMENT --

Tungod niini, nahimo siyang usa sa labing iladong drug trafficker sa Mexico ug gisentensiyahan og pagkabilanggo.

Gidakop siya niadtong 1989 ug nagpabilin sa maximum-security prison sa estado sa Jalisco, bisan pa sa balik-balik nga hangyo sa iyang mga abogado nga ibalhin siya sa house arrest tungod sa nagkagrabeng panglawas.

Gi-isip ang iyang papel sa pagtukod ug pagpalapad sa drug trafficking networks isip usa sa mga hinungdan sa dugay nang gubat tali sa mga drug cartel sa Mexico, nga sulod sa daghang dekada miresulta sa gatusan ka libong namatay ug nawala nga mga tawo.