Nagpahayag ang Philippine National Police (PNP) sa ilang kaandam nga motabang sa posibleng extradition o pagbalhin sa lider sa Kingdom of Jesus Christ (KOJC) nga si Pastor Apollo Quiboloy ngadto sa Estados Unidos.
Matod ni Police Brigadier General Allen Rae Co, hepe sa Public Information Office (PIO) sa PNP, mosunod ang kapulisan kon adunay mando gikan sa korte nga motabang sa maong proseso ug pagsiguro nga luwas ang iyang pagbiyahe paingon sa airport.
Gikataho nga ang Makati Regional Trial Court nag-isyu og warrant of arrest alang sa extradition ug hold-departure order batok kang Quiboloy ug sa duha pa niya ka kauban nga gipasakaan usab og kaso.
Kini may kalabotan sa mga reklamo nga naglakip sa international human trafficking, sex trafficking, conspiracy, ug pagpayuhot og dagkong kantidad sa salapi.
Una nang nagpahayag ang National Bureau of Investigation (NBI) nga andam usab silang mohatag og tabang kon si Quiboloy ibalhin na ngadto sa US.











