-- ADVERTISEMENT --

Gitubag ni Bohol Governor Erico Aris Aumentado ang mga alegasyon nga nalambigit siya sa mga scam hub nga gi-raid sa mga otoridad sa lungsod sa Panglao ug Dauis, diin 31 ka mga Chinese National ang nasikop.

Hugot nga gihimakak ni Aumentado ang bisan unsang koneksiyon sa mga dinakpan ug sa giingong sindikato nga nalambigit sa investment, cryptocurrency ug love scam nga mokabat sa kapin 10 million US dollars.

Matod sa gobernador, produkto lamang sa imahinasyon sa iyang mga politikal nga kontra ang mga post sa social media nga nag-angkon nga adunay kalambigitan kaniya sa maong operasyon.

Dugang usab ni Aumentado nga ang maong mga alegasyon gihimo kay aron sa umaabot nga election filing sa sunod tuig, diin matod niya, posibleng gigamit kini aron madaot ang iyang reputasyon ug maimpluwensiyahan ang mga gustong modagan sa politika nga moatbang kaniya.

Gihagit pa gani niini ang mga nagpakaylap sa maong mga alegasyon nga moduol sa mga barangay aron didto tubagon ang mga impormasyon nga ilang gipatik sa social media.

-- ADVERTISEMENT --

Matod pa sa gobernador, nahatagan na niya og katin-awan ang mga lumulupyo sa mga barangay kabahin sa iyang pagkontra sa mga alegasyon nga iyang gitawag nga bakak.

Gihangyo usab niini ang mga Bol-anon nga dili magpadala sa mga post nga walay kasigurohan ang tinubdan nga ang tuyo mao lamang ang pagdaot sa uban.