Mipahibalo ang lider nga military-backed government sa Myanmar, nga si Presidente Min Aung Hlaing, niadtong Miyerkules nga ang iyang administrasyon magrepaso sa umaabot nga relasyon niini uban sa Association of Southeast Asian Nations (ASEAN), human sa iyang giingung dili patas nga pagtratar sa regional block.
Kini ang Gipadayag ni Min Aung Hlaing atubangan sa kapin sa 540 ka mga magbabalaod ug opisyal sa kaulohan nga Naypyitaw. Nahitabo kini human sa usa ka pahayag gikan sa mga lider sa ASEAN atol sa usa ka summit sa Pilipinas—diin gipahinumdoman nga ang Myanmar wala nakahimo og igong pag-uswag sa pagpatuman sa five-point peace plan.
Gisalikway niya ang pahayag sa ASEAN isip dili makatarunganon, ug nangatarungan nga nagpakita lamang kini sa personal nga baruganan sa pipila ka mga lider, imbes nga usa ka kasabutan nga giuyonan sa tibuok grupo.
Sa usa ka pakigpulong nga milungtad og kapin sa duha ka oras, giakusahan usab niya ang ASEAN sa pagpahamtang og political pressure ug pagsulay sa pagpakaulaw sa Myanmar. Matod niya, kini nga mga aksyon wala gihimo batok sa ubang mga member states nga nakasinati usab og mga kudeta ug krisis sa politika sukad niadtong 1967.
Bisan pa sa plano nga repasohon ang relasyon niini sa tibuok grupo, giklaro ni Min Aung Hlaing nga ang Myanmar magpadayon sa pakig-alayon sa matag indibidwal nga nasod nga miyembro sa ASEAN. Dugang pa, nagplano usab sila nga magpahigayon og peace conference karong Pebrero, nga gitumong aron makab-ot ang dugay nga kalinaw.
Angay hinumdoman nga ang Myanmar nagpabilin nga nahimulag gikan sa internasyonal nga komunidad. Ang mga taas nga opisyal niini gidid-an sa pagtambong sa mahinungdanong mga miting sa ASEAN sukad nga giilog sa militar ang gahom gikan sa gobyerno ni Aung San Suu Kyi niadtong 2021.











