Gikatakdang mobiyahe ang mga miyembro sa Gilas Pilipinas paingon sa Malaysia karong adlawa, Sabado, Nobyembre 21, 2026.
Kini alang sa ikalimang hugna (Window 5) sa 2027 FIBA World Cup Asian Qualifiers.
Ang ubang mga magduduwa sa Gilas nga anaa karon sa gawas sa nasod gilauman usab nga molupad paingon sa Kuala Lumpur aron moapil sa national team alang sa sunod-sunod nga mga praktis, agig pangandam sa duha ka gikatakdang duwa.
Aduna pay usa ka semana ang koponan sa dili pa nila atubangon ang mga national team sa Syria ug Iran.
Sumala sa opisyal nga eskedyul, makigsangka ang Gilas batok sa Syria karong Biyernes, Nobyembre 27, nga sundan sa ilang duwa batok sa Iran karong Domingo, Nobyembre 29.
Ang Pilipinas kasamtangang adunay rekord nga 4-4 ug nagtinguha nga makasiguro sa ikaupat niining sunod-sunod nga pag-apil sa FIBA World Cup.
Si Coach Tim Cone na usab ang mangulo sa national team alang niining duha ka mahinungdanong mga sangka.










