-- ADVERTISEMENT --

Gideklarar ang usa ka “crisis alert” sa mga nasod sa South Pacific nga Fiji ug Tonga tungod sa grabeng hulaw nga dala sa phenomenon nga El Niño.

Matod sa gobyerno sa Fiji, ang nagpadayon nga huwaw sa rehiyon miabot na sa lebel nga giisip nga “krisis,” hinungdan nga gideklarar ang usa ka nasudnong kalamidad.

Gipahayag ni Fiji Prime Minister Sitiveni Rabuka nga nag-atubang ang mga pamilya sa nasod og seryosong problema bahin sa suplay sa tubig, lakip na ang uban pang mga kadaot nga resulta sa dugay nga pag-uga.

Base sa mga lokal nga taho, mius-os na ngadto sa makapaalarma nga lebel ang ilang suplay sa tubig, hinungdan nga nagpadala na ang mga awtoridad og daghang mga trak aron maghatod og tubig ngadto sa mga baryo nga grabeng naapektuhan.

Samtang, susamang sitwasyon ang natala usab sa Tonga, diin gideklarar ang 27 ka adlaw nga “state of emergency” tungod sa kakulang sa tubig nga dala sa kaylap nga hulaw.

-- ADVERTISEMENT --

Matod ni Tonga Acting Prime Minister Viliami Latu, makatabang kini nga deklarasyon sa mga serbisyo sa emerhensya aron daling matubag ang mga panginahanglan sa katawhan taliwala sa maong krisis.