-- ADVERTISEMENT --

Mihangyo sa impeachment court si House prosecutor Terry Ridon nga tangtangon gikan sa opisyal nga rekord ang pamahayag ni defense counsel Sheila Sison, kinsa nagpasabot nga nag-usik-usik lang sa oras sa korte ang pagpadayon sa husay batok kang Vice President Sara Duterte.

Nagsugod ang mainit nga panagbayloay sa dihang gipasabot ni Sison kon nganong dili makatambong ang mga saksi sa depensa sa mga pagdungog nga gikatakda sa sunod semana.

Matod ni Sison, nag-amping ang kampo sa depensa sa oras sa korte ug wala nag-abuso sa proseso sa hustisya, dungan sa pag-ingon nga dili mahimong mogahin sila og tulo ka bulan sa pagpresentar og mga saksi aron lang bawion kini sa ulahi.

Dihadiha nga misang-at si Ridon og move to strike batok sa maong pamahayag, apan nagpabilin sa iyang baroganan si Sison ug miingon nga nagsulti lang siya sa kamatuoran.

Agig tubag, namugos si Ridon nga wala mausik ang oras sa korte ug gipasiugda nga kinahanglang maklaro ang maong isyu atubangan sa hukmanan.

-- ADVERTISEMENT --

Ang pamahayag ni Sison nagtumong sa lakang sa prosekusyon niadtong Oktubre 2026 nga bawion ang tulo sa upat ka articles of impeachment—kadtong may kalabotan sa confidential funds, pagdawat og suborno, ug seryosong mga hulga—aron magtutok na lang ang husay sa nahabilin nga sumbong bahin sa unexplained wealth.