Gipasiugda ni Philippine Coast Guard (PCG) Spokesperson Rear Admiral Jay Tarriela ang dakong importansya nga masabtan sa mga batan-ong Pilipino ang soberanya ug katungod sa kadagatan sa nasud taliwala sa nagpadayong tensyon sa West Philippine Sea.
Sa usa ka pamahayag, gikutlo ni Tarriela si kanhi Supreme Court Associate Justice Antonio Carpio nga naghulagway sa pakigbisog sa West Philippine Sea isip usa ka intergenerational nga away, diin angay masayod ang sunod nga henerasyon kon unsa ug nganong nakigbisog ang nasud.
Matud pa sa opisyal sa PCG, usa kini ka taas nga pakigbisog nga dili dayon mawala sa umaabot nga panahon, busa gikinahanglan nga masabtan sa kabatan-onan ang kamahinungdanon niini ug ang ilang obligasyon isip mga Pilipino.
Gipasidan-an usab ni Tarriela nga kon dili masayod ang mga batan-on sa maong isyu inig abot sa panahon nga sila na ang mangulo sa nasud, seguradong mapildi ang Pilipinas ug mahimong magmadaogon ang China bisan og walay usa ka bala nga ipabuto.











