CEBU – Epektibo karong adlawa ang pagdumala ni Cebu City Vice Mayor Michael Rama isip acting Cebu City Mayor human nga ni-file ug tulo ka semana nga leave of absence si Mayor Edgardo Labella tungod sa tambag sa doktor niini nga mopahuway una aron hingpit nga maka recover sa infection.
Una na nga gibutyag sa Mayor kagahapong adlawa nga niadtong buwan sa Enero sa dihang na-diagnosed kini nga adunay ear infection apan human sa “thorough check-up” , nasuta nga adunay sepsis o blood infection.
Subay niini, gibutyag ni Vice Mayor Rama atol sa press conference niini karong adlawa nga mo-apelar kini sa National Government nga respetuhon ang otonomiya sa lalawigan sa Cebu lakip na ang palisiya niini sa swab testing sa mga Returning Overseas Filipinos ug sa mga OFWs. Gipadayag usab ni Rama ang pagsuporta sa dakbayan sa Sugbo sa maong palisiya sa Probinsiya.
Samtang andam usab ang dakbayan nga motabang sa mga ROFWs nga anaa sa kauluhan na stranded gumikan sa pag-divert sa mga flights sa Mactan-Cebu International Airport ngadto sa NAIA.
Gimanduman na ni Rama ang mga hingtungdang ahensiya sa pag-koordinar sa maong mga indibidwal aron maka uli sa ilang tagsa-tagsa mga lugar inig kahuman sa kwarantina. llBJS
