CEBU CITY — Gisuta sa mga imbestigador ang motibo sa pagkamatay sa acting deputy chief sa Cordova Police Station human gibanhigan duol sa usa ka tunghaan sa Brgy. Poblacion, Cordova, Cebu.
Giingong gipusil sa wala mailhing mga riding-in-tandem ang biktimang si Police Chief Master Sergeant Deogenes Carillo.
Base sa pasiunang imbestigasyon sa kapulisan, gisundan sa mga riding-in-tandem samtang nagdrive si Carillo pauli sa ilang panimalay sakay sa iyang puti nga pickup truck ug gipusil kini sa makadaghang higayon.
Gikasubo sa hepe sa Cordova PNP nga si Police Captain Efren Diaz Jr. ang nahitabo ni Carillo diin iya kining gihulagway nga usa ka hilomon nga tawo.
Matud ni Diaz nga adunay negosyo nga pautang ang biktima samtang nagserbisyo kini sa PNP.
Dugang pa ni Diaz nga ila pang hinabi-on ang pamilya ni Carillo alang sa dugang pa nga personal background niini.
Samtang gikumpirmar sa tigpamaba sa Cebu Provincial Police Office nga si Police Lieutenant Colonel Eleveo Marquez nga nalakip sa drug watchlist ni Pres. Duterte si Carillo.
Matud ni Marquez nga na-assign kaniadto ang biktima sa Drug Enforcement Unit sa Naga City Police Station apan narelibuhan kini sa wala matino nga hinungdan.
