CEBU CITY-Nakahatag og kabalaka ang pagbalik sa African Swine Fever (ASF) sa dakbayan sa Sugbo ngadto sa mga lokal nga tigbuhi og baboy ug mga mag-uuma.
Human kini gipahibalo ni Dr. Alice Utlang, ang pangu sa Department of Veterinary Medicine and Fisheries (DVMF), nga adunay pito ka mga sample sa dugo gikan sa Barangay Bonbon sa dakbayan sa Sugbo, ang gisumiter sa Department of Agriculture Regional Animal Disease Diagnostic Laboratory Region VII (DA-RADDL 7), ang nag-positibo sa ASF.
Niadtong Hulyo 16, namatikdan ni Utlang nga pito ka baboy ang namatay niadtong Hulyo 14 ug nagpositibo sa ASF.
Hinungdan nga ila nang gipaalerto ang mga bukirang barangay pinaagi sa ilang Rabies group chat ug gidasig sila sa pagpatuman sa border control measures.
Apan, sa pakighinabi sa Bombo Radyo Cebu Kang Dr. Alice Utlang gipaambit niini nga bisan paman nga nagpahigayon na og disinfection ang mga farmer, kay aduna gihapoy mga kaubanan nga taga DVMF nga moadto sa lugar arun sa pagkoleta sa mga dugo sa mga baboy nga gikordon.
Sumala sa World Organization for Animal Health (WOAH), ang ASF usa ka makatakod nga sakit nga viral nga makaapekto sa mga binuhi ug ihalas nga baboy nga adunay sintomas nga taas nga hilanat, pagkawala sa gana, ug pagdugo sa panit ug internal nga mga organo, ingon man kasagaran kay mosangpot sa kamatayon sulod sa pipila ka adlaw.
Wala kini hulga sa kahimsog sa tawo apan adunay grabe nga epekto sa ekonomiya tungod sa pagkawala sa kahayupan ug mga pagdili sa pamatigayon nga gipahamtang aron makontrol ang mga outbreak.
