Gipakanaog sa minority bloc sa Senado si Senador Alan Peter Cayetano isip Senate President tungod kay dili na niya matuman ang iyang mga katungdanan isip lider sa Senado.
Kini human nabalda pag-usab ang sesyon gahapong adlawa tungod sa wala pagsulod sa mga miyembro sa majority senators.
Sumala sa minoriya, gilapas ni Cayetano ang Senate Rules 14 Section 41 nga nag-ingon nga ang Senate President mahimo lang nga mo-adjourn o mo-suspend sa sesyon human sa pagkonsulta sa Majority leader ug Minority leader, butang nga wala gibuhat ni Cayetano.
Giinsistir usab sa Malacañang nga si Presidente Ferdinand Marcos Jr. wala manghilabot sa mga panghitabo sa Senado, ingon man nga gisupak ang pahayag ni Cayetano nga ang mga panghitabo sa Senado kabahin sa pakigbisog alang sa kagawasan sa institusyon.
Matud ni Palace Press Officer Claire Castro nga dili klaro kung unsang klase sa kagawasan ang gihisgutan ni Cayetano ug giingong kooperasyon taliwala sa mga sanga sa gobyerno importante ug dili angay nga mahimong pasangil sa dili pagsunod sa balaod.
Nipagawas usab og pamahayag si VP Sara Duterte, diin gipasiugda niini nga kanunay siyang nagtuo nga ang kagawasan sa mga institusyon kinahanglan nga panalipdan.
Giasoy niini nga ang usa ka gobyerno nga nahadlok sa pagsupak wala magpakita og kusog inay nagpadayag kini og kawalay kasegurohan.
