VIETNAM-Nihalapad pa ang kaso sa African swine fever outbreak sa nasud sa Vietnam.
Kini taliwa sa nag-unang pag-aprobar sa gobyerno sa Vietnam sa duha ka mga bakuna batok sa ASF, usa ka tuig na ang milabay.
Diin ang maong mga bakuna mao’y unang mga bakuna sa kalibotan batok sa makadaot nga sakit sa mga baboy.
Gani, una niini nagpagawas na usab ang gobyerno sa Vietnam og mga dokumento diin kini nagpahayag sa kahadlok nga ang posible nga pagkaylap sa sakit makaapekto sa suplay sa lokal nga pagkaon, ug presyo sa mga konsumedor.
Gikatahong karong tuiga, niabot og 42,400 ang mga apektadong baboy nga kinahanglang patyon sa Vietnam human matino nga apektado gayud kini sa ASF.
Kung kahinumdoman, ang Department of Agriculture of the Philippines unang niingon nga ang bakuna batok sa ASF nga gamiton sa mass trial maggikan sa Vietnam.
Apan giinsister sa DA, hunongon dayon kini kung adunay problema.
Niining miaging tuig, ang World Organization for Animal Health (WOAH) kay nagpasidaan batok sa bakuna ug miinsistir nga gikinahanglan ang dugang testing.
