Gipasabot ni Alice Guo kung nganong namakak siya bahin sa iyang tinuod nga nahimutangan sa bag-ohay nga mga buwan.
Matod sa legal counsel sa kanhi mayor nga si Atty Stephen David, giingong giingnan siya ni Alice nga ang hulga sa iyang kinabuhi mao lang ang rason nganong napugos siya nga dili isulti kaniya ang tinuod nga lokasyon.
Kahinumduman nga miinsister ang abogado nga anaa pa sa Pilipinas si Guo hangtod nga nigawas nga gidakop kini sa mga sakop sa Indonesian Police ug mibalik sa Pilipinas.
Gidugang ni David, nagtuo si Guo nga ang mga nanghulga sa iyang kinabuhi naniid lang kaniya kon iyang isulti ang iyang address.
Gisubli usab sa abogado nga si Alice gusto na nga mo-surrender sa mga awtoridad bisan sa wala pa siya masubay ug madakpan sa mga awtoridad sa Indonesia.
Apan matud niya nga dili maka-surrender ang kanhi mayor tungod sa hulga sa iyang kinabuhi.
