Nipasaka og 62 ka ihap sa mga kaso sa money laundering ang Department of Justice (DOJ) batok kang dismissed Bamban, Tarlac Mayor Alice Guo.
Anaa karon sa kustodiya sa Pasig City Jail si Guo alang sa pag-atubang sa 26 ka ihap sa paglapas sa Anti-Money Laundering Act (AMLA).
Nag-atubang usab siya og lima ka ihap sa paglapas sa Section 4 (b) sa samang kaso tungod sa pag-convert, pagbalhin ug pagpalit o paggamit og instrument o propyedad.
Nag-atubang usab sa samang kaso ang iyang mga ginikanan nga sila si Jian Zhong Go ug Lin Wenyi ingon man ang iyang mga igsuon nga sila si Shiela ug Seimen Guo ug 26 ka uban pa nga nalambigit sa ilang operasyon sa Philippine Offshore Gaming Operators (POGO).
Base sa 48 ka pahina nga resolusyon nga gipagawas sa DOJ panel of prosecutors, ang ginansya gikan sa POGO sa Baofu compound nga gipanag-iya ni Guo gibalhin sa ubang lehitimong negosyo sa pamilya.
Niadtong 2023, gi-raid sa mga awtoridad ang POGO sa Baofu compound diin ilang gidakop ang 300 ka mga langyaw, kasagaran mga Chinese citizen.
Niadtong Marso 13, 2024, ang nasangpit nga lugar gi-raid usab batok kang Zun Yuan tungod sa iyang pagkalambigit sa labor trafficking, cryptocurrency scam, love scam ug investment fraud.
Gikompirmar ni Prosecutor General Richard Anthony Fadullon nga napasaka na nila ang kaso sa korte sa Capas, Tarlac samtang ang resolusyon giisyu niadtong Enero.
