ASTURIAS, CEBU– Patay ang usa ka amahan samtang kritikal ang kahimtang sa iyang anak atol sa pagpamusil sa Asturias, amihanang kasadpan sa Sugbo, Domingo sa gabii, Oktubre 13, 2024.
Sa pakighinabi sa Bombo Newsteam kang Police Lt. Col.Julius Garcia, hepe sa balamban police station, iyahang giila ang mga biktima nga sila si Jasper Tito Zorilla, 46, ug Jericho Echavez, 24-anyos.
Base sa inisyal nga imbestigasyon, gisulod sa suspek ang balay sa mga biktima ug gipusil ang amahan.
Hinungdan, nga dali kini nga gidala sa iyang asawa ug anak sa duol nga tambalanan sakay sa motorsiklo sa lungsod sa Balamban.
Apan, sa dihang nakita sila sa suspek nga nagpadulong sa tambalanan gisundan sila niini.
Dihang iyahang naapsan gipusil na usab sa suspek ang amahan apan, ang bala naigo hinuon sa ulo sa anak nga maoy nagsapnay sa lawas sa iyang amahan samtang nagmaneho sa motorsiklo ang iyang inahan./
Tungod niini, nawad-an og balanse ang motorsiklo ug natumba sa karsada.
Daling gidala sa tambalanan ang tulo ka sakop sa pamilya apan gideklarar nga dead on arrival ang Amahan.
Sa kasamtangan, ang anak nagpabilin nga naka-confine ug anaa sa kritikal nga kondisyon.
Ning kasamtangan, gipangita sa mga otoridad sa lungsod sa Balamban, ang suspek.
Sa pagkutlo sa asoy sa mga saksi, ang suspek giila nga si Michael Saba Roso, residente sa Brgy. Singsing, Balamban.
Base sa inisyal nga findings, double attack kini batok kang Zorilla.
