CEBU CITY- Hilabihan ang kasubo sa usa ka amahan sa kalit nga kamatayon sa iyang anak nga bag-ong graduate human kini malumos sa Budlaan Falls sa Barangay Budlaan, Cebu City niadtong Sabado, Hulyo 12, 2025.
Sa eksklusibong pakighinabi sa Bombo Radyo Cebu Newsteam, gipaambit ni Patrick Caballes, amahan ni Jerson Caballes, ang dakong kaguol nga ilang gibati sa trahedyang nahitabo.
Matod ni Caballes, nananghid si Jerson kaniya ug sa iyahang asawa nga mag-hike uban sa iyang mga higala, ug tungod kay kini man ang hilig sa ilang anak ug anaa na kini sa hingkod nga pangedaron, ilang gitugotan kini nga walay pagduha-duha.
Apan, wala gayud nila damha nga kadto na diay ang ulahing higayon nga makapananghid si Jerson kanila, kay dili na kini makauli nga buhi sa ilang panimalay.
Sa mga alas 8 kapin sa gabii, duha sa mga higala ni Jerson ang miadto sa ilang balay aron ipahibalo nga naaksidente ang ilang anak.
Didto, nag-ampo siya sa Labaw nga Makagagahom ug gitawag ang tanang santos, naglaum nga buhi pa ang iyang anak bisan pa ug gamay nalang ang kinabuhi niini.
Apan, sa ilang pag-abot sa lugar sa insidente, ilang nasugatan ang lawas ni Jerson nga wala nay kinabuhi. Sa dihang ilang nasaksihan ang kamatuoran, daw nahugno ang ilang kalibutan.
Gipadayag pa ni Caballes nga hilabihan ka-close ang iyang mga anak kaniya, nga duha ra kabuok.
Gani, sa sama nga adlaw sa trahedya, giimbitar pa ni Jerson ang iyang ‘ate’ nga muoban sa ilang adventure.
Apan, gumikan sa kabusy niini, mibalibad ang iyang magulang – usa ka butang nga karon hilabihan ang pagmahay sa iyahang anak nga babaye.
Busa, gihangyo ni Caballes ang iyang anak nga babaye nga dili niya basulon ang iyang kaugalingon, tungod kay dili kini ang gusto ni Jerson, nga pinangga kaayo ang iyang igsoong babaye.
