CEBU CITY-Gipamatud-an pag-usab sa Court of Appeals sa Dakbayan sa Sugbo sa kabalido sa mga kontrata ug sa legalidad sa pagbaligya sa 45 ka ektarya nga lote sa South Road Properties (SRP) nga gipanag-iya sa siyudad, nga gilain sa duha ka dagkong real estate conglomerates niadtong 2015.
Kini human gibalibaran sa korte ang Very Urgent Omnibus Motion ni kanhi Mayor Tomas Osmeña aron iklasipikar ang iyang apelasyon isip special civil action for certiorari and prohibition.
Ang hukom nga gipagawas kaniadtong Setyembre 27, 2023, nagpabilin nga epektibo, diin gibasura sa korte ang motion for reconsideration ni Osmeña tungod sa kakuwang sa merito.
Ug ang resolusyon nakuha pinaagi sa Sangguniang Panlungsod public session agenda, ug kini opisyal nga gi-endorso gahapon, Oktubre 16, 2024.
Ang resolusyon sa korte, nga giproklamar niadtong Agosto 29, 2024, maoy usa ka kalamboan sa kaso ni Osmeña sukad pa niadtong 2019, diin giingong “illegal and undervalued” ang mga kontrata nga gipirmahan ni kanhi mayor Michael Rama sa SM-Ayala Consortium ug sa Filinvest Group property.
Matud ni Lawyer Amando Ligutan,legal counsel ni Osmeña, niingon kaniadto nga ilegal nga gibaligya ang maong lote sa kantidad nga P17 bilyones ug mahimong mobalor og kapin sa P50 bilyones.
Nangatarungan ang kanhi nga dili balido ang kontrata ug walay saktong awtoridad si Rama gikan sa Cebu City Council sa paghuman sa pagbaligya.
Apan, ang korte mihukom batok kang Osmeña, nga nag-ingon, ang kaso karon dili usa ka kiha sa magbubuhis, ug ang nag-apela, dili makakiha isip usa ka magbubuhis isip iyang punto sa panagbingkil.
