CEBU CITY- Adunay nay bag-ong arsobispo ang Archdiocese of Cebu human sa bag-o lang nga kamanduan ni Pope Leo XIV didto sa Vatican City niadtong Miyerkules, Hulyo 16, 2025.
Gitudlo ni Pope Leo XIV si Bishop Alberto “Abet” Uy sa Tagbilaran, Bohol isip maoy bag-ong arsobispo sa Sugbo.
Kini ang ikaduhang episcopal appointment sa Pilipinas sa Santo Papa diin si Uy maoy muhulip ni Archbishop Jose Palma kansang ang gikatakdang resignasyon sa posisyon kay hingpit nang gidawat.
Nisugat si Palma sa iyang ika-75 nga adlawng natawhan niadtong Marso 19 diin sa maong edad kay gikinahanglan na kining mukanaog sa pwesto.
Nagsilbi si Palma nga arsobispo sa Sugbo sulod sa 14 ka tuig ug ang muhulip niini nga si Uy kay gikatakdang maong ika-5 sa kasaysayan sa archdiocese.
Natawo sa Ubay, Bohol si Uy ug nagtuon siya og philosophy sa Immaculate Heart of Mary Seminary sa Tagbilaran City ug theology sa St. John Mary Vianney Theological Seminary sa Cagayan de Oro City, diin nakakuha siya og master’s degree sa pastoral ministry.
Naordinahan nga pari para sa Diocese of Talibon niadtong 1993 diin nagkupot siya og daghang mga tahas sa diocese ug naghupot usab siya og licentiate sa sacred theology gikan sa Loyola School of Theology sa Quezon City.
Gikan sa 2002 hangtod 2006, si Uy nagtuon sa Pontifical Gregorian University sa Roma, nga nakakuha og doctorate sa sacred theology.
Gitudlo ni Pope Francis si Uy nga obispo sa Tagbilaran niadtong Oktubre 2016 diin pormal siyang milingkod sa pagkapangulo sa diyosesis niadtong Enero 6, 2017, usa ka adlaw human sa iyang ordinasyon sa pagka-obispo.
Ang Sugbo, naila nga “cradle of Christianity in the Philippines,” nga maoy pinuy-anan sa mga 4.7 milyones ka mga Katoliko sa kapin sa 170 ka parokya.
