CEBU CITY- Mipaambit og pag-ampo ang Archdiocese of Cebu sa pagpangulo ni Archbishop Alberto “Abet” Uy sa mga manguli sa ilang mga probinsya karong panahon sa Semana Santa.
Kini ang mensahe sa arsobispo atol sa Angelus prayer niini naidtong Domingo, Marso 29 diin gipadangat niini ang pag-ampo nga ang mga manguliay nga susama ni Hesus kaniadtong misulod kini sa Jerusalem sa kabubot-on sa Labawng Makagagahom kay muuli dili lamang sa pisikal nga aspeto apan lakip usab ang pagpanumbalik sa pagtuo sa Magbubuhat kauban sa pagbag-o sa kinabuhi ug paghinulsol.
Dugang mensahe sa arsobispo ang pagtimbaya niini sa mga matuohon nga sa hinaot nga bisan man og daghan nga mga butang ang naghatag og kahadlok karong panahona apan angayng hinumduman ang mga rason nga mas musalig sa Labawng Magbubuhat sa pagpasulod niini sa atong tagsa-tagsa ka mga kasing-kasing nga maghari ang pagsalig ug kalinaw.
