CEBU CITY — Nagpaabot ang Archdiocese of Cebu sa pamahayag gikan sa Vatican aron maklaro kung unsa ang buot ipasabot sa pagpabor ni Pope Francis sa same-sex civil union.
Sa nahimong interview sa Bombo Radyo ngadto sa tigpamaba sa archdiocese nga si Msgr. Joseph Tan, nagkanayon kini nga nanginahanglan ang ilang habig og klarong konteksto sa nahimong pamahayag sa Santo Papa gikan sa dokumentaryong “Francesco” kabahin sa pagpuyo sa magtiayong adunay susamang gender nga sama lang sa ordinaryong pamilya.
Matud ni Tan nga ang “canonical concern” niini mao ang legal arrangement sa pagpuyo sa same sex couple, diin adunay katungod sa pagpanag-iya og mga kabtangan, ug dili ang pagpakasal.
Hinuon gitahud sa Simbahang Katoliko ang matarong nga pagpuyo sa magtiayong adunay parehong gender, taliwa sa hugot nga baruganan niini kabahin sa pagpakasal sa opposite sex.
Mihangyo karon ang archdiocese sa publiko nga dili mohimo dayon og kongklusyon o mga pronouncements kabahin sa opisyal nga baruganan sa Vatican.
Kini bisan pa man og nagkayagaw na ang publiko sa pamahayag nga giluwatan ni Papa Francisco gikan sa usa ka salida.
