Miapelar si Atty. Israelito Torreon sa mga Senador nga tagdon usa ang kaugmaon sa nasud kon ang desisyon sa Korte Suprema sa impeachment complaint batok kang Bise Presidente Sara Duterte ipadayon sa botasyon sunod semana.
Giila si Torreon isip usa sa mga abogado nga misang-at og petisyon sa Korte Suprema aron kuwestiyonon ang legalidad sa reklamo, usa ka butang nga sa ulahi gipaboran sa labawng hukmanan.
Matod ni Torreon, walay makapugong sa mga Senador sa pagbotar kung ipadayon ba o dili ang paghusay batok sa bise presidente.
Hinuon matod niya nga angay nilang tagdon ang kaugmaon sa nasud tungod kay ang ilang buhaton o ang resulta sa ilang gibuhat mao gyud ang hinungdan sa constitutional crisis nga magbutang sa nasud sa dugang problema.
Bisan og usa lang ka numbers game kon himuon kini sa Senado, ang abogado nagtuo nga angay una nga pamalandongan sa mga Senador ang posibleng resulta sa maong lakang, kon ila kining ipadayon.
Gikatakdang hisgotan sa Senado ang isyu karong Agosto 6, adlaw nga Miyerkules.
Matod ni Atty. Torreon, katungod sa matag Senador ang pagbotar sumala sa ilang kaugalingong baruganan kon bahin sa nahisgutang boto apan siya nagtuo nga kadaghanan sa mga Senador nakasabot sa gahom sa Korte Suprema sa pagpasabot sa mga probisyon sa konstitusyon.
Masaligon usab ang beteranong abogado nga nakasabot ang kadaghanan sa mga Senador nga kinahanglang sundon nila ang desisyon sa SC inay ang ilang personal nga desisyon.
