CEBU CITY — “Dead on the spot” ang usa ka babaye human kini gipusil-patay sa wala pa mailhing mamumuo sa Brgy. Basak-Pardo, ning syudad sa Sugbo kagabie.
Giila ang biktima nga si Ritchie Nepomoceno, 35-anyos, minyo, ug nagpuyo sa usab sa maong dapita.
Kung mahinumdoman nga usa si Nepomoceno nga nireklamo sa 11 ka mga pulis sa Sawang Calero Police Station gumikan sa kasong extortion, grave threat, rape, ug uban pa.
Diin mismong Commission on Human Rights in Central Visayas (CHR-7) ug Integrity Monitoring and Enhancement Group-Visayas (IMEG-Visayas) ang nikumpirma sa identity sa biktima ug kalambigitan niini sa kaso sa mga abusadong pulis.
Matud pa sa mga nakasaksi sa insidente, duha ka mga wala ma-ilhing gunman ang nipusil sa biktima samtang nagbarog lang kini daplin sa kadalanan.
Naigo sa ubos nga bahin sa iyang tuong bahin sa iyang mata sa Nepomoceno nga ni-resulta sa hinali niining kamatayon.
Samtang pipila ka oras human sa insidente, girespondehan usab sa mga otoridad ang ang laing shooting incidente sa Regional Police Drug Enforcement Unit Office pasado alas nueve kagabie.
Nasuta nga nag-unay matod pa sa pagpusil sa iyang kaugalingon si Police Staff Sergeant Celso Colita sulod sa CR sa maong buhatan.
Kahinumduman nga gireklamo niadtong nakalabay’ng buwan ni Nepomuceno si Colita nga nang rape ug nangikil kaniya.
Gawas sa maong alegasyon batok kang Colita, gireklamo usab ug extortion, grave threat ang lain pang napulo ka mga pulis sa Sawang Calero Police Station, gumikan sa wala matod pa pagsubay sa proseso atol sa gipahigayong search operation sa panimalay ni Nepomuceno sa Tungkil, Minglanilla niadtong buwan sa Marso.
Niadtong Marso 10, gidala matod pa si Nepomuceno sa Sawang Calero PS ug iligal nga gi-detain. Kaduha ka higayon matod pa nga girape ni Colita si Nepomuceno.
Na-relieve sa pwesto si Colita ug ang napulo ka mga pulis ug gibutang sa Police Regional Office (PRO-7) Holding Area Unit ug niadtong Marso 30 gikasuhan ug criminal charges sa Cebu Provincial Prosecutor’s Office. (EKP/GBS/GN)
