BOHOL-Giablihan na ang pinakaunang Department of Foreign Affairs (DFA) Consular Office sa dakbayan sa Tagbilaran sa lalawigan sa Bohol niadtong Nobyembre 29, 2024.
Makaserbisyo kini sa dul-an 1.3-milyones ka mga Bol-anon dili na kinahanglang mobiyahe pa sa silingang mga probinsya aron mag-aplay o magpa-renew sa ilang mga pasaporte.
Gipangunahan kini ni Bohol Provincial Governor Erico Aris Aumentado ang pagbendisyon ug inagurasyon sa bag-ong consular office nga nahimutang sa 5th floor sa Alturas Mall sa dakbayan sa Tagbilaran.
Diin matod pa ni Governor Aumentado nga lain na usab kini nga milestone nga makapausbaw sa pagmugna og mga trabaho, turismo, ug pagtubo sa ekonomiya sa probinsiya sa Bohol.
Kaniadto, ang mga taga Bohol kinahanglang mobiyahe pa sa Sugbo, Dumaguete o Tacloban aron maka-avail sa passport services.
Karong Lunes, Disyembre 2 kay ang DFA consular office sa Tagbilaran City magsugod na sa pag-cater sa passport applications ug renewal sa first-come-first-serve basis, nga adunay 150 ka gigahin nga slots alang sa walk-in applicants, ug 50 ka slots nga gitagana alang sa Persons with Disabilities.
Sugod sa Disyembre 9, kinahanglan na ang online appointments, nga adunay listahan sa mga kinahanglanon nga gibutang sa DFA passport website.
Ang DFA Bohol pagadumalaon sa 15 ka bag-ong hired personnel nga nanumpa atubangan ni Adelio Angelito Cruz, ang assistant secretary sa Office of Consular Affairs, niadtong Nobyembre 29.
