Anaa karon sa heightened alert status ang tibuok Bureau of Immigration (BI) human sa pag-isyu sa mga warrant of arrest batok sa kanhi Ako Bicol Representative nga si Zaldy Co ug 17 pa nga giingong nalambigit sa mga anomalosong proyekto sa flood control sa nasud.
Sa usa ka pamahayag, gikumpirmar sa BI nga ang tanang pangalan sa mga akusado anaa karon sa database sa ahensya kung kini nga mga personalidad mosulay sa pagbiya o pagsulod gikan sa ubang mga nasud pinaagi sa mga airport o pantalan.
Sumala ni Immigration Commissioner Joel Viado, ang ilang opisina makig-alayon dayon sa Philippine National Police (PNP) headquarters kung sila madakpan nga nagplano nga mobiya sa Pilipinas alang sa iyang giingon nga legal ug husto nga presentasyon sa mga warrant.
Samtang, ang ilang imbestigasyon nagbutyag nga upat sa mga akusado nga naa sa listahan sa mga warrant of arrest ang anaa karon sa gawas sa nasud, lakip na si Department of Public Works and Highways (DPWH) Officer-in-Charge Planning and Designing Division Chief Montrexis Tamayo nga katapusang nakita sa Qatar, si Sunwest Inc. President ug Board Chairman Aderna Angelie Alcazar nga katapusang nakita sa Australia, ug si Sunwest Inc. Treasurer Cesar Buenaventura nga anaa karon sa United Arab Emirates.
Ang katapusang lokasyon nga natala sa pag-ikyas ni Co mao sa Japan, diin matod niya mibalik siya sa Europe pinaagi sa paglupad una paingon sa China niadtong Huwebes, Nobyembre 20.
Gipasalig sa BI nga kini nagmintinar sa suod nga koordinasyon sa mga ahensya sa gawas sa nasud uban sa mga langyaw nga katugbang ug uban pang mga awtoridad aron masiguro nga ang mga akusado dili makalikay sa ilang legal nga mga obligasyon ug responsibilidad sa katawhan.
