Pormal nang gipasaka sa Bureau of Internal Revenue (BIR) ang kasong tax evasion batok sa magtiayong Sarah ug Curlee Discaya human madiskubre ang giingong tax evasion nga mokabat sa kapin sa P7.1 bilyones.
Personal nga nisang-at sa Department of Justice (DOJ) si BIR Commissioner Romeo Lumagui Jr., dungan sa pagpasaka og kaso batok sa usa ka corporate officer sa St Gerard Construction Gen. Contractor and Development Corporation, diin konektado ang magtiayong Discaya.
Matod sa BIR, ang ilang makuti nga imbestigasyon nagbutyag sa dagkong kakuwang sa buhis sa kompanya ug sa mga opisyal niini, apil na niini ang undeclared income ug improper filing of tax returns.
Kini nga lakang kabahin sa gipakusog nga kampanya sa ahensya batok sa mga dagkong tax evaders sa nasud.
Ubos sa Run After Tax Evaders (RATE) Program sa BIR, gitumong niini nga manubag ang mga indibidwal ug korporasyon nga nakalapas sa balaod sa buhis, aron mapausbaw ang koleksyon sa pundo alang sa mga batakang serbisyo sa gobyerno.
