CEBU – Nipadayag si Bohol Governor Aris Aumentado sa panginahanglan og marksmanship training sa pipila ka mga pulis sa Bohol nga matud niya nagkinahanglan og kalamboan sa ilang kahanas sa pagpamusil.
Gipasibaw ni Aumentado ang iyang obserbasyon atol sa awarding ceremony sa Provincial Director’s Cup 2022 nga gipahigayon sa Bohol Provincial Police Office (BPPO) headquarters sa Camp Francisco Dagohoy, Tagbilaran City niadtong Martes.
Diin ang first-term governor maoy guest of honor atol sa unang edisyon sa tinuig nga kalihokan.
Nakigpulong si Aumentado sa direktor sa BPPO nga si Col. Osmundo Salibo ug mipahibaw nga mogahin kini og pundo alang sa gisugyot nga pagbansay sa marksmanship.
Namatikdan ni Aumentado ang panginahanglan sa mga pulis nga pauswagon ang ilang kahanas alang sa kampanya sa probinsya nga pakigbatokan ang kriminalidad og illegal drug trade.
Diin mituo ang local chief executive nga makatabang ang ilang pagbansay sa kahanas sa malapason sa balaud.
