BORBON, CEBU-Gipasakahan og kasong nepotismo ubos sa buhatan sa Ombudsman – Visayas ni Barangay Don Gregorio Antigua Captain Margarito Ornopia Jr. si Borbon, Cebu Mayor Noel Dotillos sa pag-hire niini sa iyang asawa nga si Dr. Corazon V. Dotillos isip municipal health consultant sa ilang kagamhanang lungsod.
Sa maong kasong gipasaka, gitataw ni Ornopia nga ang pagdayong pagtrabaho ni Dr. Corazon human sa retirement niini kay nakalapas sa Anti-Graft and Corrupt Practices Act (R.A. 3019) nga gitumbok ang iyang inadlaw nga sahuran nga P3,500 isip excessive ug conflict sa tukmang hiring process rules.
Dugang ni Ornopia nga ang Konseho sa Munisipyo nag-endorso kang Dr. Nestor Casas isip bag-ong Municipal Health Officer niadtong tuig 2020 apan, imbes nga itudlo si Casas, si Mayor Dotillos mipirma og consultancy contract uban sa iyang asawa.
Ang kontrata ni Dr. Corazon kay ma-expire na unta human sa unom (6) ka buwan apan si Mayor Dotillos kay gi-renew kini nga way pagtubay sa Sagguniang Bayan sa makadaghang higayon.
Ang pinakaulahing kontrata mao ang naglangkob sa panahon sa Abril 18 hangtud Oktubre 18 ning kasamtangang tuig.
Pangatarungan ni Ornopia nga kining pagbalik-balik sa pag-renew nakalapas sa R.A. 2260, nga nagdumala sa pagpanarbaho sa mga paryente sa serbisyo sa gobyerno, ug nag-angkon nga ang suweldo ni Dr. Corazon mas taas kaysa sa pagdawatan sa ubang Municipal Health Officer sa lungsod, nga naghatag kaniya sa dili angay nga pinansyal nga mga benepisyo.
Sa ekslusibong pakighinabi sa Bombo Newsteam kang Kapitan Ornopia Jr nga matod niya dili kini “politically-motivated” ang iayng pagpahamtang sa pasaka sa kaso kun dili ang dili lang gayud mahi-angay nga lihok sa Mayor ug sa asawang Doktor niini.
Ang maong kaso midugang sa gihimug-aton nga si Mayor Dotillos nanghimulos sa gahum aron sa pagpaburot sa katigayonan nilang mag-asawa bisan paman adunay mas takos nga mga propesyonal sa medisina ang muhupot sa pwesto.
Nanawagan si Ornopia nga suspensohon si Mayor Dotillos ug kasong administratiba ug kriminal ang ipasaka batok kaniya.
