CEBU CITY– Midangop sa Bombo Radyo Cebu ang usa ka ‘visually impaired’ nga babaye human nga makadawat ug giingong dili makaon nga bugas gikan sa Department of Social Welfare and Development 7.
Gisaysay ni Alliane Pradilla, taga Barangay Pilipog, lungsod sa Cordova, sa tulumanong Bombohanay Bigtime nga nakadawat sila ug bugas gikan sa DSWD staff nga si Flor Simbajon niadtong nakalabay nga Hulyo 6 diin gisugat pa sa iyahang bana nga usa usab ka ‘visually impaired’ nga si Jonathan Pradilla.
Matud pa nga daan na sila nga nakadawat ug mga feedback nga dili maayo ang kalidad sa bugas nga gipanghatag sa DSWD apan ilaha una gayud nga gisulayan arun nga ilahang mapamatud-an.
Sigon ni Pradilla nga ilahang gilung-ag ang maong bugas ug diha ilahang napamatud-an nga lain gayud ang baho ug hilabihan ka pait ang lasa niini.
Gidugang pa sa reklamante nga basi usab sa iyahang anak, giingong nakakita kini ug susamang mga insekto nga nagkamang-kamang sa bugas diin naila sa tawag nga ‘bokbok’.
Giingong nakasinati ang reklamante ug diarrhea.
Hangyo sa maong ‘person with disability’ nga bisan pa man ug kini hinabang lang, nanghinaut kini nga hatagan usab sila ug tarung nga pagkaon, gumikan kay sila tawo usab nga angayang hatagan ug maayo nga pagtratar.
Si Pradilla ang gradwado sa Area Vocational Rehabilitation Center (AVRC) kansang ubos sa programa sa DSWD. | SBR
