Gikalipay sa Carbon-hanong Alyansa pamaagi sa pamahayag ni Winefredo Miro ang nahimong desisyon sa City Council kabahin sa joint venture agreement sa Carbon Public Market, ug ingun man sa usa ka executive session sa umaabot Marso 17, 2026.
Basi sa pamahayag ni Miro, dako nila nga kalipay gumikan kay natagaan na og pagtagad ang ilahang panawagan ug protesta sa mga manindahay sa Carbon Public Market, tungod kay ang maong hisgutanan, kung hinomdoman, giingong gisaad kini ni Cebu City Mayor Nestor Archival nga ilahang pagasutaon ang joint venture agreement.
Atol sa ekslusibong pakighinabi sa Bombo Radyo Cebu newsteam, gidugang ni Miro nga ang maong joint venture agreement giingong gibasa sa mga konsehales kaniadto nga wala basaha kung unsa ang sulod nga konteksto niini.
Samtang, lakip sa nahisgutan ni Miro mao ang petsa kung kanus-a nasugdan nga i-privatize ang Carbon Public Market ug matod niya, nasugdan kini niadtong Enero 6, 2021, ubos sa administrasyon ni Late Mayor Edgar Labella.
Gani iyang gitataw nga dapat unta wala pay pandemya aprobado na kini, apan tungod sa pandemya na-irog kini sa tuig 2021, ug giingong walay konsultasyon nga gihimo para sa mga vendors atol sa pandemya .
Dugang niya nga ang gibuhat niadtong panahona mao ang pag-imbitar sa mga vendors kay ilahang ipang-award ang mga pwesto, hinungdan nga gikalipay kini sa mga vendors ug dayun gipang picture-ran nga giingong nagpamatuod nga ni-uyon ang mga vendors.
Apan, gitino ni Miro nga dako nilang kahibong sa dihang nakuha nila ang kopya sa joint venture agreement, gumikan kay walay klarong floor plan kung pila kabuok vendors ang masulod, ingun man ang mga baligyaon mas motaas ang kantidad.
Gihimug-atan usab ni Miro nga vendors association kaniadto sa Carbon Public Market, wala magkaparehas ang ilang baruganan.
Apan sa kasamtangan, iya nang gikalipay kini gumikan kay ang kaniadto nga mga vendors nga misupak, nagkahiusa na ang ilahang mga tingug ug panawagan.
