Gisugyot ni Cebu City South District Councilor Dave Tumulak, kinsa Council chairman sa Committee on Disaster Risk Reduction and Management, ang hinadaling pagmugna sa klarong guidelines ug safety protocols para sa mga hiking ug trekking activities sa bukirang barangay sa dakbayan ilabi kadtong adunay mga waterfalls ug suba.
Kini ang gipamahayag ni Konsehal Tumulak atol sa eksklusibong pakighinabi niini sa Bombo Radyo Cebu Newsteam diin kagahapong adlawa sa Lunes, Hulyo 14 kay nakigtagbo kini sa mga opisyales sa Barangay Budlaan inubanan sa mga personahe sa Cebu City Disaster Risk Reduction and Management Office (CCDRRMO).
Diin nagtumong sa paghisgot sa ilang buhatong aksyon may kalabot sa nagkadakong safety concerns ilabi karong panahon sa ting-uwan.
Gani dugang pa sa opisyal nga didto ra niya nahiba-an nga aduany diay pito (7) ka mga maanindot kasuyuran nga mga waterfalls sa maong dapit nga potensyal para sa turismo apan angay pangtun-an ang mga ipatuman lagda sa kaluwasan para niini aron malikayan ang dugang kadaot sa kaluwasan sa publiko ug mismong kahimtang sa kinaiyahan sa mga basurang namugna sa mga turista.
Kahinumduman nga niadtong Sabado, Hulyo 12 kay adunay natalang usa ang namatay ug mga na-stranded tungod sa grabeng haguros sa tubig sa suba ug sa waterfalls sa Budlaan.
