CEBU CITY-Mikabat sa 35 ka kilo nga karne sa baboy ang nasakmit sa mga sakop sa Department of Veterinary, Medicines and Fisheries (DVMF) kauban ang Market Operations Division atol sa gipahigayon nga surprise inspection sa Carbon Public Market.
Nasuta sa mga sakop sa DVMF ug MOD nga kontaminado na ang mga nahisgutang karne gumikan kay nausab na ang kolor niini, ingon man nga lain na ang baho.
Gipasabot ni Cebu City Market Administrator Robert Barquilla nga dili na luwas kaonon sa mga kunsomidor tungod kay naghatag na kini og peligro sa panglawas.
Sa gipahigayon nga inspeksyon, napulo ka mga stall holders ang ilahang gihatagan og warning human nga nakalapas sa sanitary standards.
Ang mga nakumpiskar nga “hot meat” kay gi-imbargo sa operating team arun nga ma-dispose og tarung.
Hangyo ni Barquilla sa mga negosyante nga siguradohon nga luwas ang gibaligya sa publiko ug dili lang mag-apas sa ginansya.
Subling gipahimangnoan niini ang mga stall holders nga dili paabton sa tulo ang ilahang notice of violations arun nga padayon pa sila nga makapaninda ug dili ipasirado ang ilahang mga stalls, ingon man nga padayon pa sila nga makapamaligya sulod sa Carbon Public Market.
