Miawhag sa mga ginikanan og mga pamilya si Cebu City Mayor Nestor Archival Sr. nga manangpit sa kagamhanang dakbayan para sa mga hinabang kung magkalisod sa kinabuhing adunay pamilya aron dili maabot sa punto nga mu-abandonar sa mga bata ilabi na sa mga bag-ong anak.
Kini ang pamahayag sa mayor human sa insidenteng adunay bag-ong anak nga bata ang gi-abandonar sa dalan Gotianuy, Barangay Kamputhaw niadtong Enero 20.
Gihimug-atan sa opisyal nga ang kagamhanang dakbayan sa Sugbo kay adunay mga buhatan nga andam muabag sa mga pamilyang nagkalisod sa panalapi partikular na ang pag-amuma sa mga bata.
Gipasalig niini sa publiko nga ang mga pamilyang nagkalisod magpadako og bata kay mamahimong mudirekta sa City Hall pinaagisa Department of Social Welfare Services (DSWS) office aron mataganahan kini og tukmang tabang.
