Gibutyag ni Cebu City Mayor Nestor Archival nga barugan gyud niya ang desisyon sa paggamit og mga tarpaulin nga naay tema sa ASEAN sa South Road Properties (SRP), bisan pa sa mga pagsaway nga gigamit lang kini aron tabon-tabonan ang pundok sa basura gikan sa panan-aw sa mga langyawng bisita.
Gipatin-aw sa mayor nga ang iyang prayoridad mao ang long-term nga pagpanglimpyo ug ang maong mga hapin nagsilbi lang nga paagi sa pagdumala sa hitsura sa siyudad samtang naay dako nga international event.
Gipasabot ni Archival nga ang maong dapit duol sa Barangay Pasil ubos sa hurisdiksyon sa Department of Public Works and Highways (DPWH) ug kapin na sa 25 ka tuig nga napundo ang basura didto, hinungdan nga imposible kining mahurot og limpyo sulod lang sa pipila ka adlaw. Matod pa niya, upat na ka backhoe ang naglihok kada adlaw apan tungod sa kadako sa volume sa hugaw, kinahanglan ang taas nga pasensya sanglit dili kini mahuman sa usa lang ka gabii.
Nalipay ang mayor sa positibong feedback gikan sa mga tourism ministers sa Asean kinsa niingon nga limpyo tan-awon ang siyudad, apan iyang giangkon nga kinahanglan gyud ang sustainablity niini.
Gidepensahan usab niya ang mga lumulupyo sa Pasil, diin iyang gihisgutan nga sila ang labing apektado sa baho ug baha tungod sa basura nga gikan ra usab sa mga dapit nga anaa sa “upstream” o ibabaw nga bahin sa siyudad.
Nanawagan si Mayor Archival sa katawhan nga undangon na ang pagreklamo ug sugdan na ang pagtinabangay sa pagpanglimpyo. Iyang gitandi ang kahimtang sa Cebu sa nasod sa Japan nga nikuha og 30 ka tuig una hingpit nga nahimong limpyo, samtang siya 200 pa lang ka adlaw nga naglingkod sa pwesto.
Gipasalig sa kagamhanan sa siyudad nga padayon ang ilang information campaign aron mausab ang batasan sa mga Sugboanon ug makab-ot ang tinuod nga limpyo nga dakbayan.
