Gisugat sa mga matam-is nga mga pag-abi-abi sa mga manindahay sa Carbon ang unang adlaw sa katungdanan sa Kagamhanang Dakbayan sa Sugbo nila ni Mayor Nestor Archival Sr. ug Vice-Mayor Tomas Osmeña kagahapaong adlawa sa Lunes, Hunyo 30, 2025.
Kini nagtimaan sa nagkahiusang sugyot sa mga manindahay sa Carbon sa bag-ong liderato sa dakbayan sa Sugbo.
Sa pamulong ni Erwin Goc-ong, ang president sa Carbon Market Vendors Development Cooperative nga nagtimaan kini sa walay kamatuoran nga alegasyon nga adunay mga pagpangluod tali ni Mayor Archival ug Vice-Mayor Osmeña.
Nahitabo ang ilang pag-abi-abi atbang sa Cebu City Hall Executive Building sa may Senior Citizens park diin nagtapok ang mga pundok sa manindahay sa Carbon.
Dugang niini nga ang ilang panagtapok nagsimbolo sa suporta sa bag-ong magdumala sa dakbayan sa tiunay sa serbisyo sa publiko ilabi na nilang mga manindahay sa tanyag nga Carbon Market.
Gani ang ilang panagtapok kay natapos sa usa ka salo-salo sa gamayng gihikay nga pagkaon sa mga manindaya para sa mga bag-ong lider sa kagamhanang dakbayan ug sa paghatod na sab nila ngadto sa tagsa-tagsa ka mga buhatan sa mga opisyales.(Bombo Ken Apor)
