Tungod sa kusog nga linog ug Bagyong Tino nga miigo sa dakbayan sa Sugbo, gikabutyag ni Cebu City Mayor Nestor Archival nga ang mga disaster team nakata ang usa ka dakong kakulian nga ilang nahimamat.
Lakip na niini ang dinalian nga panginahanglan alang sa mga temporaryong puy-anan nga dali dad-on ug tipigan, paspas i-assemble, lig-on ug dili maapektuhan sa hangin, dili masudlan sa tubig ug taas gikan sa umog sa yuta, luwas alang sa mga tigulang, bata, ug persons with disabilities (PWDs), magamit sa huot nga urban areas ug kabukiran, ug barato ug scalable alang sa dinaghang paggamit.
Busa, tungod niining dinalian nga panginahanglan, ang Kagamhanan sa Siyudad sa Sugbo nag-awhag ug naghangyo sa atong mga lumulupyo, arkitekto, inhenyero, builders, unibersidad, organisasyon, ug mga innovators sa pagtabang sa pagdisenyo og usa ka praktikal nga prototype sa emergency shelter.
Ang target dimensions mao ang 2m x 2m nga floor area nga matulgan og 34 ka tawo, gamit ang gaan nga materyales, maayo ang bentilasyon ug protektado sa ulan, ug mahimong i-stack o pil-on alang sa pagtipig.
Sumala ni Archival, ang katuyoan niini mao ang paghatag og temporaryo apan matinahuron nga kapuy-an alang sa mga pamilyang nawad-an sa pinuy-anan, pagsuporta sa paspas nga pagtubag sa umaabot nga katalagman, ug pagkunhod sa paggamit sa mga classroom sa eskwelahan.
Ang mga interesado, sama sa inhenyero, arkitekto, estudyante, designer, fabricator, NGO, civic groups, ug pribadong sektor, mahimo nang magpaila sa ilang partisipasyon pinaagi sa numero sa City Disaster Office ( 09228235807).
