![](https://img.bomboradyo.com/cebu/2020/01/TAAL-ASSISTANCE.jpg)
CEBU CITY – Andam muhatag ug hinabang ang Cebu City government ngadto sa mga biktima sa pagboto sa Bulkang Taal sa Batangas.
Kini ang gibutyag ni Cebu City Mayor Edgardo Labella atol sa pakighinabi sa Bombo Radyo Cebu.
Matud ni Mayor Labella nga sa pagkakarun nagpahigayon una ug ‘assessment’ kung unsa nga klasi sa tabang ang ihatag sa dakbayan sa Sugbo.
Sigon pa sa mayor nga nakat-on na sila kaniadto atol sa bagyong Yolanda nga adunay mga lugar nga dili hilabihan nga apektado apan mao ang nahatagan ug financial aid.
Gihimug-atan niini nga dili kini gusto nga subling adunay ma-usik nga financial aid hinungdan nga gipahigayon una ang pag-assess sa mamahimong matabang sa City government.
Giingong posibling ugmang adlawa ilahang masayran ang resulta sa gipahigayon nga assessment.
Apan gisiguro ni Mayor Labella nga matabangan ang mga biktima sa Batangas susama sa pagtabang sa syudad sa Sugbo sa mga biktima sa linog ug bagyo sa South Cotabato, Davao, Daanbantayan ug Medellin.
Nagkanayon ang opisyal nga kung unsay gikinahanglan mao ang ipadala sa LGU sa Batangas kung diin mamahimo kini nga cash assistance.